PARI, BALIK PAMILYA, BALIK PAROKYA 2010

Mga kalihokan nga may kalambigtan sa pagsaulog sa simbahan sa Tuig sa mga Pari ang sunod-sunod nga gipahigayon sa atong parokya niadtong Mayo 15, 16 ug 17, 2010.

Sa unang gabii, miabot ang mga ginikanan sa mga pari nga Minglanillahanon , dungan usab sa pagduaw nila ni Msgr. Camilo Alia ug ni Fr. Bernard Amparado. Malipayon silang gihangop ug gi-abi-abi sa Team Moderator sa atong kaparian nga si Fr. Jojo Deligero, ug sa mga sakop sa Parish Pastoral Council.

Sa ikaduhang adlaw gihimo ang usa ka thanksgiving concelebrated mass nga gipangulohan ni Msgr. Alia uban sa parish Team of Pastork ug samga pari nga sakop sa nagkalainlaing kongregasyon sa parokya.

Human sa Misa, ang Parish Pastoral council ug si Fr. Jojo Deligero ug ang mga bisita miduaw sa mga balay sa mga religious congregations. Malipayon sila nga gidawat ug gi-abi-abi sa mga nagdumala sa unom ka mga religious congrerations nga ilang gibisitaan. Kini mao ang mga kongregasyon nga ilang giduaw: Daughters of Divine Zeal sa Kingswood, Sisters of the Queen of Apostles sa Pakigne, Daughters of Wisdom sa Calubihan, Daughters of Mary of Help Christian sa Tungkop, Franciscan Brothers sa Tulay ug Somascan Fathers Seminary sa Bayong.

Nianang pagkagabii sa maong adlaw, nagdungan sila pagpanihapon ug madasigong nagpaambitay ang mga ginikanan sa ilang mga kasinatian sa pagpadako sa ilang mga anak hangtud sa ilang pagsuporta niini sa higayon nga mihukom kini nga mosud sa Seminaryo aron magpari.

Mipaambit usab Msgr. Alia sa iyang mga hunahuna ug mga kasinatian isip anak ug sakop sa usa ka banay, ug sa iyang mga kasinatian isip pari.

Mihatag usab sa ilang panahum ang mga seminarista nga mitambong sa maong panagtigom.

Gipahigayon sa ikatulong adlaw ang panagsabot2x alang sa mga umaabot pang kalihokan sa maong pundok sa mga ginikanan sa mga pari.Gilauman sa tanan nga makab-ot ang tumong ug panglantaw sa maong panagtigom.

Sa laing bahin, sa adlawng Lunes ,Mayo 17, sa alas 2:00 sa hapon, adunay Concelebrated Thanksgiving Mass nga gipahigayon pahinungod sa Profession of Final Vows ni Sis. Maria Dolores S. La Rosa, LGC nga usa ka lumad nga taga Minglanilla.

Ang LGC (Living the Gospel Community) nahimugso dinhi sa atong parokya ug gitukod ni Msgr. Fred Krekeinbeck panahon sa iyang pagdumala isip kura paroko sa atong simbahan.