Sa makausa pa, magsaulog na usab kita sa kapistahan sa Putli nga Kasingkasing ni Maria. Ug sa ika-29 nga higayon sukad nahimo siyang Coadjutor Archbishop sa Artsdiyosesis sa Sugbo niadtong tuig 1981, gihimong Arsobispo sa tuig 1982 ug giproklamar nga Cardinal ni Papa Juan Pablo II niadtong Mayo 25, 1985, mobisita na usab si Ricardo J. Cardinal Vidal sa atong parokya aron makigsaulog uban kanato.
Haum sa tema sa kasaulogan karong tuiga nga “Maria, Inahan nga Masaksihon, Maamomahong Piniyalan” ang pagduaw sa Cardinal dinhi matag piyesta; timaan kini sa iyang pagtamod sa mga hiyas ni Maria isip piniyalan.
Kon mahinumduman sa miaging tuig, bisan pa man adunay gibati sa lawas ang Cardinal niadtong higayona, wa kadto makapugong kaniya sa pag-anhi aron sa pagpangulo sa Pontifical Mass uban sa bisita nga mga Obispo ug Kaparian. Ug sama sa naandan na sa kadaghanan sa Minglanilla, madasigon silang motambong sa Pontifical Mass karong adlaw sa piyesta Agosto 22, 2010 sa alas 10:00 ang takna sa kabuntagon.
Alang sa mga magtutuo, ang presensiya sa Cardinal igo na kaayong makapadasig kanila sa pagsuporta sa mga kalihokan nga ipahigayon sa Parish Team of Pastors ug sa Pastoral Council tungod kay sayod sila nga kining maong mga programa dugtong man ngadto sa mga programa nga iyang giduso nga ipatuman..
Tungod niini, gihangop nila sa dakong kalipay ang panaglambigitay nga nahitabo sa gihimo nga Medical Mission, Mass Wedding, Libreng Pagpamunyag, Pagbag-o sa mga Saad sa Kaminyoon, Healing Mass. Walk with Mary, Misa –Novena, ug uban pang kalihokan nga kutay sa kasaulogan sa piyesta.
Ginahimo kining tanan agi’g timaan sa pagkahiusa sa mga parokyano isip masaksihon ug maamomahong piniyalan alang sa ilang isig ka ingon.
Mabuhi ang Cardinal !
Mabuhi ang mga Parokyano !
Malipayong Piyesta !
Ave Maria! (AC)
-o0o-
No comments:
Post a Comment