FR. OSCAR ORNOPIA NANGAYO UG PASAYLO, UNYA MISAAD…

                “Una sa tanan, mangayo ako kaninyo ug pasaylo, tungod kay napasagdan ko kamo.”

               Mao kini ang pamahayag ni Fr. Oscar Ornopia ngadto sa mga sakop sa Zone Pastoral Councils, ug sa mga chapel officers uban sa ilang WESTY Chairpersons, atol sa Bisita Zona nga gihimo niadtong buwan sa Hunyo dinhi sa atong Parokya.

                Tumong sa maong pagbisita mao ang pagpangumusta sa mga nahisgotang mga liders sa kahimtang sa ilang relasyon isip mga pangulo ug ang pagdumala nIla sa ilang mga katungdanan, ilabi na kabahin sa WESTY Ministries.

         Nagmaabli ang mga tumatambong sa pagpaambit sa ilang kasinatian pinaagi sa pagtubag sa mga pangutana nga gidason ni Fr. Ornopia ug sa iyang mga kauban nga mga Pastoral Workers nga sila si Fe Abiera ug Christine Lopez.

         Walay lipud-lipod silang misugilon sa ilang mga kasinatian ug mga kakulangan sa pangalagad. Bukas usab silang mipadayag sa ilang mga gibati ug misaysay sa ilang mga problema. 

Sa iyang bahin, si Fr. Oscar mapahiubsanon usab nga miangkon sa dakong kakulangan sa mga tigdumala sa parokya sa pag-atiman kanila nga mga lider sa tagsa-tagsa nila ka gagmayng katilingban.

Matud niya, “Na-busy kami sa paghikutar sa lain pa nga mga butang nga among gihatagan ug unang pagtagad” .

Ang matag panagtigum gitapos kanunay ni Fr. Oscar sa saad nga sa sunod buwan sugdan na ang mga kalihokan haron paghatag ug “on-going formation” sa mga lider.

Ang “On-going Formation” maoy kahigayonan nga igahin alang kanilang mga lider aron mahulma sila isip mga kiristohanong pangulo ug madugangan ang ilang kahibalo ug kahanas  sa pakiglambigit sa usag-usa ug sa pagdumala sa ilang mga katungdanan.

Ang mga kapilya diin gihimo ang mga bisista zona mao kining mosunod: Hunyo 10, 2010 Zone 1, Sto. Niño Calajo-an, Hunyo 13, Zone V, Brgy. Vito, Sta. Filomena, Teves ug Zone IV, Brgy. Cadulawan, San Miguel, Hunyo 14, Zone II, Brgy. Tulay, Sñr. San Roque, June 17, Zone VI, VII, VIII, IX, IHM Parish Pastoral Center, Hunyo 18, Zone III, Brgy. Tunghaan, Sñr. San Vicente Ferrer.

Gisultihan ang mga tumatambong nga hatagan lang unya sila ug sulat-pahibalo kung kanus-a mahitabo  ang gisaad nga “On-going Formation” sa matag tagsa nila ka kapilya. . (AC)