PANAHUM

Usa sa mga naandan na nga paagi sa pag-ampo alang sa mga katoliko mao ang pag-novena ug ang pagdebosyon sa mga Santos.

Daghang katarungan nganong ang usa ka tawo magdebosyon ug mopili nga mangama sa usa ka Santo aron himuon niyang taytayan ngadto sa labawng makagagahum.

May mopili sa pagdebosyon sa ilang santos nga sangay o kaha sa santos nga saulogan ug piyesta atol sa ilang adlawng natawhan.

Aduna say uban nga tungod sa pagkadalayegon man ang binuhatan sa usa ka santo niadtong buhi pa kini, naikag nga himuon ang maong santo nga modelo sa iyang kinabuhi ug sa matag karon ug unya sangpiton, pangayoan ug tabang ug debosyonan.

May uban nga naduso sa pagpangama ug pagdebosyon sa gituhoang santos nga mila-groso tungod kay nakasinati man ug krisis sa ilang kinabuhi ug buot mahaw-as gikan niini.

Apan bisan pa man sa mga nagkalahi nga hinungdan, makaingon kita nga ang pagdebo-syon sa mga santos maoy usa ka pagpadayag sa tawo sa iyang pagpaubos sa gahum sa Dios; usa ka pag-angkon sa pagkawala niyay mahimo pagsulbad sa iyang mga problema sa kaugalingon lamang niyang galamhan, kusug ug kaalam.

Nagkinahanglan siya ug abag, bisan gani diha sa pag-ampo.

Ug tuod man, bunga sa iyang pagpaubos makadawat siya ug grasya, makaangkon sa iyang gitinguha, ug makatagamtam sa gipangandoyng kabulahanan.

Ug unya, magsaulog siya - maglipay, magsadya ug maghimaya sa Dios; magdayeg Kaniya nga maoy tag-iya sa tanang butang, moyukbo ug moila nga Siya ang tinubdan sa tanang kabulahanan.

Ang pagsaulog nato karon sa kapistahan sa putli nga kasingkasing ni Maria nahisubay ba kaha niining maong diwa? Diwa sa pagpaubos, pagyukbo, pangama ug pasalamat?

Himayaon ta ang Dios uban sa pagdawat ug pag-angkon nga kining tanang ania kanato gasa gikan Kaniya, ug isip gasa ang katuyoan niini mao ang pagpaambit niini ngadto sa uban.

Hinaut pa unta.
(AC)