“Pagkalig-on gayud diay sa diwa sa pagtinabangay sa mga parokyanhon sa atong parokya”, matud pa ni Huwan nga nakasaksi sa daghang tawo nga miabag sa mga kalihokan sa Semana Santa.
Ang kanhi niya kabalaka kung aduna pa bay Parish Assistance group (PAG) nga moabag sa pagpahigayon sa procession ug sa uban pang kalihokan, nahanaw dihang iyang nasaksihan ang daghang pundok nga nakahiusa sa pagtabang nga mahapsay kini.
Aduna pa man diay PAG”,matud pa niya. “Ug gawas kanila, may mga batan-on pa gayud nga mitabang pag-cordon sa mga karo, ang PYCC ug ang pundok sa mga Kaabag, gipun-an pa sa bag-ong pundok nga gitawag ug Minglanilla Volunteers Organization (MVO) nga abtik usab kaayong nakig-alayon sa Pulis, MiTCom ug sa Unified Barangay Tanods, wa gyud diay tay angay kabalak-an, husay ang tanan”, padayon pa niya.
“Buhi gyud diay ang pagtuo sa mga taga-Minglanilla ! “
Makahuloganon gayud ang pagsaulog ni Huwan sa Semana Santa, gawas sa dihangnisaksi siya sa Sugat - Kabanhawan Festival nianang pagka-Domingo.
Nindot ang mga sayaw, milarawan gayud kini ug Kabanhawan. Kabanhawan sa bisan unsa na lang mga butang, mga bulak, dahon, kawayan,kabaw, ug uban pa. Sadya kaayo, daghang tawo. Adunay artista. May mga politiko nga mihatag ug pakigpulong ug naghisgot sa ilang mga nahimo ug mahimo pa alang sa lungsod..
“Sugat–kabanhawan? May kalambigitan ba kining maong Festival sa Pagkabanhaw ni Kristo?”, nangutana si Huwan. “Sumpay ba kining kalihokan sa bag-o pa gayud nga gipasundayag nga Sugat? Ang makahuluganong Sugat sa Minglanilla?”
Gisuhid ni Huwan pag-ayo ang mga pasundayag sa festival, ug tuod man iyang nakit-an si Hesus didto nga uban sa mga contestants- usa ka Higanteng Pahoy nga nagkindang-kindang , ingon sa nagsayaw-sayaw ug nagtinguha nga manghagwa sa mga nanan-aw. Naghinuklog si Huwan.Mihukom nga mopauli aron mamalandong sa tanan niyang nakita. Daghan pang mga pangutana ang mitumaw sa iyang hunahuna. Naglibog pa siya, ug wala siya masayod kinsa ang makahatag kaniya ug katin-awan alang niini.
Huwan Yano
c/o Pakigsandurot
Email: huwanyano@gmail.com
c/o Pakigsandurot
Email: huwanyano@gmail.com
Cell No. 09194406282
No comments:
Post a Comment