Duha ka adlaw sa dili pa ang pangilin
Tago nga pagpatay kang Hesus gihambin
Sa Betania sa kahigalaan nakig-uban
Sa babayeng makakasala gidihugan
Pasaylo ug maayong panag-ingnan sa tawo gibilin.
Ang usa sa pagbudhi hilom nakigsabot
Sa panag-uban ang katloan ka salapi maoy limot
Agalon nakigsalo, mahugawng mga tiil gihugasan
Panihapon gipahandum sa kanunay ang kaluwasan
Sa tanan nag-ampo aron wala ni usa maalaot.
Paglimod sa gitawag nga Bato katingalahang gitagna
Di mosalikway ang tanan tagana’g nanumpa
Sa hardin dugo gi-ula, pagpanubos gisugdan
Kalisang, kahingawa nga ang pag-antus laktawan
Pagkamalumo sa tanang higayon siya naila.
Miabot na, mialirong na, ug siya gidakop
Mga tawong kaayo sa Diyos di mosagop
Giguyod, gipaatubang sa labawng hukmanan
Ang labaw sa tanan gihukman,
kadakung kataw-anan
Kamatayon sa krus ang silot, kadakung sayop.
Namatay, gilubong ug gipabantayan
Lawas sa patayng Diyos di mahilabtan
Tulo ka adlawng walay Diyos nga masangpit
Para sa katawhan aron sa kaaway di masakmit
Katubusan sa sala and labing hinungdan.
Diyos gayud siya motuo ang kalibutan ug dili
Umari kamo, pagmaya ug pagdali
Nabanhaw na ang kanato magluwas
Himayaa ang Diyos, duol pagpaspas
Buhi ang nating karnero nga Putli.
No comments:
Post a Comment