TUGKARAN KO, SIMBAHAN KO

Kapilya ni Snr. San Vicente Ferrer
(Cadulawan)

Ang kapilya sa San Vicente Ferrer Zone 4, Cadulawan magsaulog sa ilang piyesta karong Abril 17, ikatulong Sabado sa bulan. Natukod ang maong kapilya niadtong 1996.
Gipili nila si Snr. San Vicente nga himuong patron tungod sa pagkamilagroso sa imahen niini sa makadaghan nga higayon. Ang imahen ni Snr. San Vicente Ferrer gipanag-iya ni Macaria Paran, nga usa ka taga Mindanao niadtong panahon pa sa hapon.
Ginaingon nga kining imahen gihulaman sa uyuan ni Macaria nga si Sopriano Selgas nga taga Toledo, ug gitukuran kini ug usa ka gamayng kapilya didto. Usa ka higayon niana nasunog ang maong kapilya ug milagro nga wala maapil pagkasunog ang maong imahe.
Sa ikaduhang higayon sa Brgy. Matun-og diin mibalhin ug puyo si Sopriano nasunog pag-usab ang altar nga iyang gihimo alang sa imahe ug sa ikaduha nga higayon wala gihapon kini maapil sa pagkasunog.
Si Istanislao Quizon nga maoy gibinlan sa maong imahe maoy nagtukod ug kapilya alang niini sa Cadulawan aron sa paghimaya sa pagkamilagroso sa maong Santo.Ang katilingban sa kapilya ni Snr. San Vicente Ferrer sa Cadulawan gilangkoban sa mga sakop sa 31 ka mga panimalayug gipangulohan kini ni Amelita Geonzon.

-oOo-

WAF Block Rosary Units BRUs

Natukod ang lokal nga chapter sa World Apostolate of Fatima (WAF) dinhi sa atong parokya niadtong December 8, 2000, ug ang unang napili nga pangulo niini mao si Bro. Moises Gaspe.
Pagkakaron aduna nay 31 ka mga Block Rosary Units (BRUs) sa nagkalainlaing mga kapilya sulod sa parokya ang napasiugdahan sa maong pundok.
Ang usa ka BRU gilangkuban sa mga pamilya nga managsilingan nga sakop sa usa ka kapilya ug hiusang magpundok aron sa paghimo ug Block Rosary.
Adunay Imahen sa Birhen ang matag BRU nga ihatud sa panimalay sa usa ka pamilya aron moestar didto sulod sa usa ka semana.
Ang mga sakop sa banay nga hingtungdan maghiusa sa pag-ampo sa Santos nga Rosaryo matag gabii hangtud moabot ang adlaw nga ang Imahen kuhaon ug ihatud na usab sa laing silingan.
Ang mga banay nga sakop sa maong BRU maghimo usab sa pagrosaryo sa ilang kaugalingong panimalay samtang ang Imahen nagpabilin pa didto sa balay nga hingtungdan.
Sa usa ka tuig mobalik ang Birhen makaunom ka higayon sa matag panimalay nga sakop sa BRU isip simbolo sa unom ka bulan nga pagpakita sa Birhen sa tulo ka mga bata niadtong Mayo 13 hangtud Octobre 13 sa tuig 1917 didto sa Fatima.