Bag-ong Sinugdanan: Bag-ong Gasa, Bag-ong Paglaum
“Matag kabuntagon usa ka bag-ong sinugdanan; matag sinugdanan nagdala ug paglaum.”
Ang pagsugod sa klase sa atong mga kabataan karong buwan sa Hunyo sa tagsa-tagsa nila ka mga tulunghaan maoy usa ka pagpadayag sa katawhan sa ilang paglaum nga sa umaabot nga mga katuigan adunay makab-ot nga kausaban paingon sa kalamboan ang atong katilingban pinaagi sa edukasyon sa ilang mga anak.
Sa laing bahin, ang paglingkod na unya sa bag-ong napili nga Pangulo, ug sa iyang mga kauban nga mokupot ug katungdanan sa pangagamhanan sa atong nasud, naghatag na usab kini ug bag-ong paglaum sa katawhan nga sa umaabot mahimong tul-id na ang dagan sa atong panggobiyerno.
Sa atong Simbahan, ilabi na dinhi sa Artsdiyosesis sa Sugbu, bag-ong gasa sa paglaum na usab ang natagamtam sa mga magtutuo pinaagi sa bag-ong mga Pari ug Diakono nga gi-ordinahan karong buwana.
Samtang may kinabuhi pa ang tawo aduna gayuy paglaum
Ang matag ginhawa nga iyang himuon, bisan pa man sa kangitngit sa kahimtang nga iya karong gisagubang , nagpadayag kini nga naglantaw pa siya sa unahan, ug may nakita pa siyang banag-banag sa bag-ong kabuntagon.
Ang atong pag-angkon sa atong mga kasaypanan – sa atong pagpakasala, inubanan sa atong pagsalig sa gugma sa atong Dios, malaumon kitang tanan nga hayag ang atong ugma, tungod kay matinud-anon man ang Dios.
Busa padayon kita sa atong panaw isip katawhan kay ang gingharian ila niadtong mga tawong mapahiubsanong mopahiuyon sa kabubut-on sa Dios.
Hinaut pa unta.
No comments:
Post a Comment