PANAHUM

Pagpangandam sa Usa ka Masaulogong Panagtagbo

Ang kinabuhi sa tawo tugob sa kahigayonan sa panagtagbo.

Panagtagbo tali sa duha lamang ka binuhat o kaha panagtagbo  gayud tali sa tawo ug sa iyang magbubuhat.

May mga panagtagbo nga tinuyo ug aduna say daklit lang ug wala gayud tuyoa.

Sagad sa mga  panagtagbo nga tinuyo nagkinahanglan ug pangandam agad sa kabililhon niini alang sa mga magtagbo.

Bililhon kaayo ang mga sakramento sa Simbahan ilabi na ang Liturhiya sa Santos nga Misa.

Mahinungdanon kining maong panagtagbo tungod kay dinhi makiglambigit man ang Magbubuhat sa iyang mga binuhat, ug angay gayud kini nga  ikalipay sa tawo tungod nagtinguha man siya nga mahiusa ug mahiuli ngadto sa Dios.

Tungod niini, ang Simbahan kanunayng nagpahinumdum  kanato sa paghatag ug dakong pagtagad sa pagpangandam alang sa atong pagtambong niining maong mga kasaulogan; kasaulogan sa panaglambigit nga mosangpot ngadto sa pagkahiusa uban ni Kristo Hesus.

Ang mga pangandam nga gibuhat karon dinhi sa parokya alang sa kasaulogan sa piyesta karong Agusto maoy usa ka pagpadayag sa kadako sa bili nga gihatag sa mga parokyanhon  alang niining mahiusahon  panghitabo.

Sukad niadtong buwan pa sa Hunyo,ang Team of Pastors ug ang PPC, inubanan sa mga boluntaryiong alagad sa parokya, naggahin ug igo nga panahon sa pakigtagbo sa mga kaigsoonan nilang parokyanhon.

Gihimo ang mga kalihokan sama sa Bisita Zona, diin gitigum ang mga pangulo sa mga kapilya aron pagsusi sa kahimtang sa ilang pangalagad; gihimo usab ang Bisita kapilya nga giubanan sa mga Doktor nga mipahigayon ug Medical Mission, ug padayon usab nga gihimo ang naandan nang  Duaw-Sangyaw Sa mga kapilya.

Kini maoy mga tinuyong kahigayonan nga magkaabot ang mga nagkadaiyang sektor sa katilingban: edukado ug dili edukado, adunahan ug kabus, Pari ug layko, hiusang   mag-alagaray sa usa’g-usa.

Gilauman  sa mga tigdumala nga kining mga higayon sa panagtagbo mopalig-on sa panaghiusa ug panaglambigit sa tanan, ug ang mga tinagsip nga mga pagsaulog matingub ngadto sa dakong kasaulogan sa kapistahan sa atong mahal nga patrona, ang Putli nga kasingkasing ni Maria.

Magdinasigay kita, ipadayag nato ang atong pagkahiusa.

Mag-ambahan kita paingon sa gilantaw natong kasaulogan.

Malipayong pagpangandam ! (AC)