PANAHUM

Katungdanan ug Katungod

Katungdanan sa matag kristiyano ang pagpuyo isip kahimanan sa gugma , kalinaw ug kaangayan.

Tungod niini, dili masalikway sa simbahan, isip usa ka institusyon, nga mangita ug sulbad sa mga tiningub nga kapaitan nga mahitabo sa katawhan sulod sa katilingban.

Dakong katungdanan sa simbahan ang pag-agak sa iyang mga sakop aron dili sila mahiagom sa bisan unsang kaulipnan nga mohulga sa ilang pagkagawasnon.

Ang atong parokya nagpahigayon ug mga kalihokan nga tumbok sa pagpalambo sa kinatibuk-ang kinabuhi sa mga sakop niini.

Ang Leadership Training maoy tubag sa panginahanglan sa kakulangan sa mga maayo ug matinud-anong pangulo sa katilingban.

Ang “operation linis” ug ang duso sa simbahan nga mangaliya kita nga malikay sa dugang pang kabangis sa sakit nga dengue maoy usa ka mapakabanaong buhat alang sa panalipod.

Pipila lamang kining nahisgotan sa mga padayon karong gihimo sa parokya ug daghan pa ang giplano alang sa umaabot, depende sa tawag sa panahon.

Padayon nga nagtutok ang simbahan sa bisan unsang kalihokan nga maka-apekto sa kinabuhi sa mga tawo.

Walay hunong kining mag-aninaw ug magpakabana.

Buluhaton natong tanan isip sakop nini ang pagpagpaluyo ug pagsalmot sa bisan unsang kalihokan nga maka-abag sa uban aron matagamtam sila sa kagawasan isip mga anak sa Dios.

Ato kining katungdanan, katungod kini sa tanan. (AC)