Ang Pagduaw sa Mahal nga Birhen

ni Jonas Mananay

Nagpunsisok ang katawhan nga mitagbo sa International Pilgrim mage sa Our Lady of Fatima nga mibisita sa atong parokya sa Putli nga Kasing-kasing ni Maria niadtong Biyernes, Oktubre 8, 2010. Ang maong imahen nga gikan sa nasud sa Portugal miabot sa atong nasud niadtong buwan sa Hulyo 2010 aron sa pagduaw sa nagkalain-laing Dioceses ug Archdioceses sa atong nasud.

Miabot ang maong imahen sa atong parokya gikan sa iyang pagduaw sa parokya sa San Vicente Ferrer, sa Bato, Toledo City, alas 10:30 sa buntag.

Nahimong hingpit ang pagmaya sa mga parokyano sa Putli nga Kasing-kasing ni Maria sa pag-abot sa imahen sa may plaza Maria nga gidawat sa dakong kahinangop sa Team of Pastors, uban sa mga Lay Ministers, mga sakop sa World Apostolate of Fatima, ug sa ubang mga katolikong grupo sa parokya dinuyogan sa pagwara-wara sa mga tawo sa ilang mga kamot ug mga banderitas.

Bisan sa naglagiting nga kainit sa adlaw malipayong mitimbaya ang katawhan sa Mahal nga Birhen, pagpadayag sa pagkamainiton sa ilang pagtuo ug sa gibati nilang pagkabulahan niadtong buntaga.

Agi’g pagsugod sa maong kalihokan, giyayongan ang imahen sa mga Lay Ministers paingon sa sulod sa simbahan, gibutang kini sa walang bahin sa atubangan sa altar sa simbahan, gihalaran ug hamubong pag-ampo ug gisundan sa Santos nga Misa nga gipangulohan ni Rev.Fr. Joey Belciña ug si Fr. Jojo Deligero ang mihatag sa homiliya.

Human niini, gisugdan dayon ang pag-vigil, pinangulohan sa mga pundok nga gitahasan sa pagturno nga mangulo sa pag-ampo sa matag oras.

Sa pagka alas Tres sa hapon, gihimo ang usa ka pulong-pulong aron sa paghatag ug kasayuran mahitungod sa mensahe sa Birhen didto sa Fatima.

Gipadayon ang pag-vigil pagkahuman sa maong kalihukan hangtud sa pagkagabii.Gidumog sa daghang tawo ang simbahan niadtong higayona, dili lamang sa mga parokyano sa Putli nga Kasing kasing ni Maria apan lakip usab sa mga parokyano sa kasikbit nga mga parokya.

Sa pagka Sabado, 0ktubre 09, 2010, alas 6:30 sa buntag, gipahigayon ang Santos nga Misa agig pangandam sa paghatod sa imahen ngadto sa Shrine of our Lady of Fatima sa Basak, Mandaue diin mo-istar usab kini didto ug usa ka adlaw ug usa ka gabii.