PANAHUM

Pasko Alang sa Tanan

Disyembre, panahon sa Pasko.

Higayon sa pagbalik-lantaw, ug sa pag-aninaw sa kahimtang karon sa imong kinabuhi; sa kahimtang sa imong panglawas, sa nahipos nga mga butang , bahandi o salapi; sa imong posisyon sa katilingban, sa kalamposan nga nakab-ot; sa mga kabulahanan nga nadawat gikan sa Dios.

Alang sa kadaghanan, higayon karon sa pag-paambit ug pagpanghatag.

Ug nunot niining maong panghunahuna, higayon usab karon sa pagpanggawas sa mga kabus ug mga biniyaan sa katilingbanong pag-uswag o pag-asenso.

Higayon karon alang kanila nga mosalikway sa ilang kauwaw nga dala sa ilang kahimtang sa pagka-alaut.

Higayon na karon nga makaduol sila sa mga adunahan aron mangayo ug pahat sa kabulahanan nga hinatag sa Dios alang sa tanan.

Ikaw igsoon nga nagbasa niini karon, nagpangayo ka ba o naghatag? Naningil ka ba o namayad?

Unsa man kaha ka dako ang imong utang sa kabus nimong mga igsoon nga masakiton, naglibudsuroy nga hubo ug walay kapuy-an, giuhaw, gigutom, gidaug-daog ug gikalimtan?

Kabulahanan ang saad sa paglaum nga dala sa pagkahimugso ni Hesus.

Karong panahon sa pasko, ipaambit ang imong kabuhong ngadto sa uban.

Mao kini ang matuod nga espiritu sa pasko.

Malipayong pasko sa tanan. Tanan Gayud! ( AC)