Pasko sa Parokya Gipangandaman, General Assembly Gihimo

Kapin sa usa ka gatos (100) ka mga opisyales sa Zone ug Chapel Pastoral Councils ang nanambong sa General Assembly niadtong Disyembre 5, 2010, ala 1:00p sa udto hangtud sa alas 4:00 sa hapon, didto sa Parish Pastoral center.

Tuyo gayud nga gihimo ang maong asembliya alang sa pagpangandam sa mga kalihokan sa Pasko 2010.

Kasaysayan

Nahimo nang tradisyon ang tinuig nga kalihokan nga gitawag ug Pasko sa Parokya sukad pa niadtong tuig 1994, panahon sa pagdumala ni Fr. Eliseo Gamallo isip padre kura sa parokya.

Napahigayon ang unang Pasko sa Parokya pinaagi sa pagpaningkamot ni Fr. Jinny Villamor, ang kaabag nga pari ni Fr. Gamallo ug sa Parish Pastoral Council niadtong higayona, inabagan sa Parish BEC Secretariat.

Sumala pa ni Alan Caña, usa sa mga sakop sa kanhi Parish BEC Secretariat, wala pa sukad mahitabo nga adunay tuig nga walay panagtigum aron sa pagsaulog sa pasko sukad gisugdan kining maong tradisyon.

“Daghan nang mga pamaagi ang gisuwayan alang sa pagpasayon sa mga buluhaton atol sa kasaulogan, apan bisan pa man nga usahay adunay mga kabulilyaso nga nangahitabo wala kini igsapayan sa katawhan tungod kay ang labing mahinugdanon alng kanila mao ang pagpadayag sa kahiusa, panaglambigit ug panag-inigsoonay sa tanan”, nagkanayon si Caña.

Matud ni Christine Lopez, parish pastoral worker, nga sulod sa gihisgotang asembliya gipahigayon ang pagmugna ug mga kumitiba nga mopasayon sa dagan unya sa kasaulogan diha sa pagpangaon, pagpahigayon sa mga pasundayag, ug pagpangulo sa mga duwa-kalingawan nga himuon.

Pangandam

Ang Pasko sa Parokya 2010 pagahimuon karong Disyembre 30, 2010, ala 9:00 sa buntag hangtud sa alas 4:00 sa hapon sa Parish Pastoral Center.

Ug didto sa gihisgotang asembliya niadtong Disyembre 5, gimugna ang mga kumitiba nga mopasayon sa dagan unya sa kasaulogan.

Ang mga nahulma nga kumitiba mao kining mosunod: Physical Arrangement ug Peace and Order- nga panguluhan ni Intes Secuya sa Sona 2, ug sa iyang mga kauban nga sakop sa Minglanilla Volunteers Organization (MVO); Program Committee – pagadumala-on ni Raulito Plarisan ; First Aid – nga pangunahan ni Rommel Verame; ug Committee on Prizes – inubanan nila ni Bernadette Respondo ug Kelvin Paul Unabia.

Sumala ni Fr. Ornopia , motampo ang kaparian gikan sa panudlanan sa parokya, ug 80 kilos ka karneng baboy aron ipuno sa mga pagkaon nga panag-ambitan sa matag Sona.

Gahinan ang matag Sona ug 8 kaKilo aron ilang isugba o himuon ba nga barbecue.

Gawas sa maong tanyag, aduna pay boluntaryo nga mi-‘pledge’ ug usa ka baboy nga ipa-ihaw aron ilakip sa pagkaon nga idalit.

Aduna nay mga miboluntaryo nga moabag sa mga buluhaton sa pag-andam sa mga pagkaon.

Gilantaw sa tanan nga mahimong alegre ug makahuluganon ang pagsaulog sa Pasko sa Parokya karong tuiga. ( AC/RP/CD ).