PANAHUM

Walay Hunong nga Pagbag-o

Bag-ong tuig, bag-ong kinabuhi; mao kini sagad nga madungog ug mahimung baruganan sa tawo dihang maghunahuna siya nga sugdan na ang paglihok aron matuman ang gihandum niya nga kabag-ohan sa kinabuhi.

Apan kining maong bag-ong sinugdanan, sumpay lamang sa nangagi - usa lamang ka pagpadayon sa pagtuyok sa ligid sa panahon.

Bisan asa kita magsugod sumpay gihapon kini sa nasugdan na ug gibalikbalik nga mga buhat, apan ang padulngan niini mahidangat gihapon ngadto sa gimbut-an sa Labawng Makagagahum.

Napadayag sa mga nangulo sa matag kapilya ang matuod nga diwa sa panaglambigit niadtong Pasko sa Parokya.

Napakita nila ang kalig-on sa ilang panaghiusa.

Maaninaw nga hapsay ang pagpadagan sa mga kalihokan, tungod kay ang mga nagdumala nahulma na man sa pagkahamtong sa lihok-pangalagad.

Apan kinahanglang ang kabanusan - ang paghatag ug higayon sa uban nga mohupot ug katungdanan , mao nga padayon karon nga gihimo ang piniliay sa mga opisyal sa mga kapilya,

Subli-subli kining ginahimo ug subli gihapon nga buhaton sa umaabot; sama sa ulan nga dili na maihap kapila na magbalikbalik sa pagbunok sa pagbisibis sa yuta hinungdan nga mogitib ug moturok ang mga tanum, ang matag piniliay nagdala usab sa samang saad - ang pagsubol sa bag-ong kinabuhi.

Bag-ong kinabuhi, bag-ong paglaum; bag-ong mga pangulo, bag-ong parokya - sumpay sa kagahapon paingon sa umabot.

Mabuhi ang tanang pangulo, daan ug bag-o! Saulogon ta ang kahiusahan, tungod kay ang tanan dugtong man ngadto sa kahingpitan sa Gingharian sa Dios.