PAROKYA NI SÑR SAN ROQUE

Ang Parokya ni San Roque sa Lipata, Minglanilla, nagsaulog sa kapistahan sa ilang patron niadtong Agosto 14, 2010, ika-duhang Sabado sa bulan sa Agosto subay sa naandan nilang tradisyon. Ang tanang mga kalihukan alang niini gipanguluhan sa ilang kura paroko nga si Rt. Rev. Msgr. Camilo P. Alia ug sa iyang mga kaabag nga sila si Rev. Fr. Riel Cantillas ug si Rev. Fr. Nilo Nemeno, inubanan sa pangulo sa PPC nga si Mr. Joventino Elandag ug sa ilang puli-pangulo nga si Mrs. Petra S. Lozada. Kini maoy ika-24 ka tuig na nilang nagsaulog sa maong kapistahan.

Niadtong kapilya pa lang ang parokya sa San Roque, sakop kini sa parokya sa Putli nga Kasing kasing ni Maria sa lungsod sa Minglanilla, ug makanunayon silang naghimo sa Flores de Mayo dinasig sa awhag ni Rev. Padre Nicholas Navarro nga maoy kura sa lungsod.

Unya mipuli si Rev. Padre Boy Aleonar sa pagkaparuko ug nipahigaayon ug misa matag unang Dominggo sa bulan.

Mipanaw si Padre Boy ug gipulihan ni Msgr. Fred Kreikenbeek nga nitukod sa kapunongan sa Legion of Mary, ug nipahigayon ug misa kada Dominggo. Gipulihan si Msgr. Fred ni Msgr. Maglasang ug makugihon nga nagpahigayon sa unang misa de gallo sa kapilya ni San Roque.

Sa tuig 1986, tulo ka pari ang mibisita, si Msgr. De la Cerna, Padre Alesna, ug si Padre Mambaje. Ang tu-lo misugyot nga himuon ug Parokya ang maong kapilya.
Ug niadtong Agosto 24, 1986, natukod ang usa ka bag-ong parokya ni San Roque. Ang unang kura nga si Padre Alan Trani nagmugna dayon ug Basic Ecclessial Communities. Misunod kaniya sa pagka-kura si Padre Joe Mamites nga makugihon nga mipadayon sa BEC.

Niadtong Mayo 18, 1992, nakabaton sila ug bag-ong kura nga si padre Mike Hisoler, nga nakapasamot sa kalambuan sa parokya. Nagpadayon sa paglig-on ang maong parokya ubos sa mga nagkalainlaing mga kura.

Ug karong Agosto 24 mao ang ilang ika-24 nga kasumaran sa pagkaparokya.

Mabuhi ang Parokya San Roque! (RDD)